مارخور

 

مارخور ، اس کا مطلب ہے سانپ کھانے والا ، کہتے ہیں کہ یہ سانپ کھانے کے بعد اپنے منہ سے جھاگ گراتا ہے ،

جو چٹانوں پر گر کر جم جاتی ہے اور قیمتی پتھر بن جاتی ہے ،

اب اس میں کتنی سچائی ہے کتنا گمان مجھے نہیں معلوم ،

لیکن جو بات میرے تجربے میں آئی وہ ضرور بیان کرتا ہوں ایک آرٹ لور خاتون نے مجھ سے پوچھا کہ آپ ،

جو یہ کام کرتے ہیں تو میں آپ کے اوزار دیکھنا چاہتی ہوں ،

میں نے جواب میں کہا کہ میرے اوزار لوہے کے صرف چند ٹکڑے نہیں بلکہ ، میری ڈائریوں میں لکھے ہوئے ،لوگوں کے وہ رویے ہیں جنہیں میں برداشت کرتا ہوں ،

اسی طرح سے کسی نے ایک بار مجھ سے کہا کہ آپ اتنی خوبصورت باتیں ( یہ میری رائے نہیں) کس سے اورکہاں سے سیکھتے ہیں ،

تو میں نے جواب دیا اس کے لیے پہلے مدتوں باتیں سننی پڑتی ہیں ،

اور اس میں بہت سی زہریلی باتیں بھی ،جنہیں برداشت اور ہضم کرنا پڑتا ہے ،

بس پھر جو الفاظ کسی جھاگ کی طرح سے منہ سے نکلتے ہیں وہ لوگوں کو قیمتی لگتے ہیں ،

شاہد حسین

11 نومبر 21